Sozdar Avesta: Divê li Şengalê yek jin jî bêrêxistin nemîne
Tevgera Azadiyê Jinên Êzidî (TAJÊ) bi ruhê rizgarkirina Şengalê û felsefeya ‘Jin, Jiyan, Azadî’ bi dirûşmeya, ‘Emê xwe ji fermanê biparêzin, azadiya jin û civakê mîsoger bikin’ di 13’ê Mijdarê de li Şengalê 2. Kongreya xwe lidar xist. Ji derveyî Şengalê û nav Şengalê, ji bo silavkirina kongreyê gelek peyam hatin şandin. Yek ji van peyaman ku mohra xwe li Kongreya TAJÊ da, peyama Endama Konseya Serokatiya Giştî ya KCK’ê Sozdar Avesta bû.
Sozdar Avesta di destpêka peyama xwe de şehîdên têkoşîna azadiyê bi bîr anîn, berxwedana gerîla ya li hemberî dagirkeriyê silav kir. Her wiha diyar kir ku yên heta niha nehiştine Şengal bikeve destên dijminan, jin û ciwan in. Sozdar Avesta bi navê Tevgera Azadiya Kurdistanê 2. Kongreya TAJÊ silav kir û got: “Li ser navê tevgerê ji Herêmên Parastina Medyayê em we silav dikin. Di şexsê rêheval Bêrîvan, Arîn, Nazê, Nujiyan, Nûjîn, Hêlîn, Nêrgiz û Mamê Êzidîxanê Mam Zekî, hevalê Seîd, Dijwar û Zerdeştan û hemû şehîdên Êzidîxanê ku ji bo parastina rûmeta mirovahiyê û rizgarkirina jinên Êzidîxanê şer kirin, em hemû şehîdên Tevgera Azadiyê bi bîr tînin. Ên ku fermana rizgarkirina Şengalê û gelê Şengalê ji bo xwe wek rûmet girtin dest û gotin, ‘em ê tola jinên Êzidî hildin’ û xwe weke xizmetkarek xeta azadiya jinan dîtin em wan silav dikin. Ji Başûr heya Rojavayê Kurdistanê gerîlayên azadiyê, yekîneyên parastinê YPG û YPJ bi hawara civaka me ya Êzidî ve hatin û civaka me ji qirkirinê rizgar kirin. Ez di şexsê wan berxwedêran de, berxwedana li Metîna, Zap û Avaşîn û hemû qadan silav dikim, berxwedana wan pîroz dikim.”
‘Dijmin dixwaze malan ji xwe re bike navendên sîxuriyê’
Sozdar Avesta di peyama xwe de balkişand ser berxwedana jinên Êzidî û wiha domand: “Di van salan de berxwedaniyeke pir mezin di pêşengiya we de hat meşandin. Hûn her roj li kolanan bûn, li ser riyan bûn, we çek da ser milên xwe û ketin çeperan. Mal bi mal geriyan û gel bi rêxistin kirin. Dem hat bi şev û roj we çekên xwe hilgirt û berê xwe da çeperên din. We gelek lehengên xwe bi tilîliyan oxir kirin, ev rûmet û serkeftineke mezin e. Wê tu kesek nikaribe vê yekê asteng bike. Îro careke din kombûna we li ser pratîk û xebatên hatine kirin e. Li Şengalê mal bi mal pêwîst e jinek tenê jî bê rêxistin nemîne, ger heya niha li Şengalê mabin jî divê çareserî were dîtin. Dijmin dixwaze malan ji xwe re bike navendên sîxuriyê. Di serî de TAJÊ divê xwe li dijî van xeteran berpirsiyar bibîne û wan ji wê riyê vegerîne. Kongre pêwîst e li ser vî esasî biryarên girîng bigire û biryar bide ku xwe çawa ji fermanan biparêze.”
‘Jinên bê parastin bi mirinê re rûbirû dimînin’
Her wiha ji bo jinên Êzidî bikaribin li hemberî hemû fermanan rawestin û bibin bersiv ji dijmin re, Sozdar Avesta diyar kir ku divê careke din rastî qirkirin, destirêjî û fermanan neyên, li kolanan neyên firotin, tedbîrên pêwîst werin girtin û peyama xwe wiha bi dawî kir: “Erkên esasî yên vê kongreyê, rêxistinkirin e, yek jî parastina cewherî û pêşxistin e. Parastina jin û rêxistinkirina wan pêwîst e. Jinên bê parastin bi mirinê re rûbirû dimînin. Pêwîst e ezmûna we ya 8 salan û îradeya we ya mezin di vê kongreyê de baş were birêxistinkirin û jin jixwebawer bin. Ji hêz û fikrên ku we xwe li ser bi rêxistin kirine bawer bin. Pêwîst e hûn ji serhildanên mezin ku îro li Rojhilatê Kurdistanê bi pêşengiya jinan didomin jî bawer bikin. Li hemberî kesên ku dixwazin jinan bixapînin û şerê taybet li ser wan didin meşandin pêwîst e hûn bibin xwedî helwest û keçên ciwan birêxistin bikin.”